Kal Raat...

Kal raat ki woh baat ab tak chhoobh raha hain kahi... Khatm kar doon khud ko ke main nahi toh koi jhamela hi nahi... Tumne kaise soch liya ke main tumhare shareer se pyar karta hoon... Kya pyar ke ek hi maayne hote hain... Tum shaayad ye sab meri nazron se girne ke liye kehti ho ya karti ho, par sach maano ye sab karne se tum aur pyari hote jaa rahi ho... Haan kuch baaton se dil dukhta hain par ye sochkar khush ho jaata hoon ke tumhe toh haq hain mujhe kuch bhi kehne ka, mujhe kisi bhi tarah se todne ka... Pyar toh koi bhi nahi kam kar sakta hain, tum bhi nahi, par haan itna zaroor toot jaoonga ke agar kabhi tumko mujhse milna ho ya dekhna ho toh mere tukde jamaa karne honge... Har tukde mein tum mere saath hogi...

Tere Bin....

Subah se mubarakbad hi mubarakbad mil rahe hain... Kehte hain aaj meri zindagi ka ek important din hain... Paida hona itna important hota hain ye aaj pata chala... Par tumhara diya hua ye judaai ka tohfa sabse behtareen hain... Door jaane ka mann nahi hain par tumne vaada kiya hain ke tum muskuraogi... Kisi ke maut par muskurana bhi toh ek kala hain... Tum kehti ho ke manaa lo usey... Manaaya bhi aur manaonga bhi, par darta hoon ke kahi aur na toot jaoon... Agar toot bhi gaya kahi toh uff tak nahi karoonga... Kaun sunega mera Uff, koi bhi toh nahi, kahi bhi toh nahi... Tum jitni koshish karti ho mujhse door jaane ki main utna hi tumhare nazdeek hota ja raha hoon... Tere bin main kuch bhi toh nahi, tujh mein samaa jaana chaahta hoon... Tere wajood ko main apna wajood banaana chaahta hoon...

Manzil Ho Meri....

Aaj main jaa raha hoon aur shaayad kabhi na wapas aao kam se kam jab tak tum na chaaho...Woh teen din bhi apne saath liye jaa raha hoon, adhoore rangey huye hi sahi par saath liye jaa raha hoon... Koi shikwa nahi koi shikayat nahi... Taras kha kar hi sahi, tumne koshish toh ki rang bharne ki... Bas ye jaan lo ke main khush hoon... Mujhe nahi samajh aata tumhara kehna ke bhool jao sab... Tumhi bata do kaise... Tumne bhi toh koshish ki, kya bhool paayi usey... Din guzarta jaayega pyar bhi badhta jaayega... Par shaayad ab tumhe keh nahi paaonga ke tumse kitna pyar karta hoon... Sach kahoon toh tumhara ye bhi baat maanne ko jee karta hain ke tumhe bhool jao par kambakht ye dil dagaa de deta hain... Bahot koshish ki dil ko samjhaane ki par har koshish naakam... Main sach mooch tumse behadd pyar karta hoon aur yakeen maano ke hamesha karta rahoonga... Chupke se hi sahi par tum mujhme yakeenan kahi samaa gayi ho... Nikaal paana namumkin hain... Aisa lagta hain tumhaare paas aakar meri talaash puri ho gayi... Manzil ho meri tum par........

Saudebaazi...

Bahot tamanna thi jab bhi mujhe kisi se sachha pyar hoga toh main usey kam se kam ek letter toh zaroor likhoonga...likha bhi... par saath hi le kar chala aaya...darta tha kahi wo usey mera convince karne ka koi hathkanda na samajh le...darr ke kahi usey mujh par daya na aa jaaye...Us raat uska haath thaama tha par wo sirf haath tha...raat bhar dhoonda usey un haathon ki chhooan mein uski parchhaiyan tak nahi mili...Usey pyar tha par mujhe bhi toh pyar tha, shayad us ke jitna na ho par kam bhi toh nahi...Mann toh mera bhi karta hain ke main uske gaalon par haath rakh ke kahoon ke wo kitni sundar hain...uske baalon mein haath ferkar kahoon ke tum aise nahi iss tarikey se apne baal style karo...Usey mujhse door jaana hain, mere khayalon se door jaana hain...Main rokna chaahta hoon usey par kaise roku, main koi bhi toh nahi uska...Saare haq us ne hastey hastey wapas maang liye aur main uski hassi dekhne ke liye usey deta raha...Main nahi dena chaahta tha wo saare haq par uski hassi bhi toh dekhni thi...Laalchi ho gaya hoon uske muskaan ka...Ab toh haal ye hain ke wo mere khayalat, mere sapne jis mein uska aana jaana hain wo bhi maang rahi hain...Kaise de doon usey ye...Ye sapney, ye khayal hi toh hain ab mere paas ke jis mein main usey jo chaahoo jab tak chaahoo baat kar sakta hoon, uske saath chhat par saari saari raat haathon mein haath rakhe yu hi bina kuch kahey suney bita sakta hoon, usey jaise chaahoo pyar kar sakta hoon...Par ab usey ye bhi chaahiye badle mein hassi degi...Pata nahi sauda kaisa hain par shayad iss baar bhi main haar jaaonga...Wo le jaayegi sab apne saath bas ek hassi ke badle aur Main bas ek khaali dukaan liye patthraayi aakhon se dekhta rahoonga kyunki hassi jis par saara sauda hua wo toh uske saath hi chali jaayegi...